Fólk í USA hava ov høgt blóðtrýst

Sambært nýggju reglunum eigur blóðtrýstið ikki at fara upp um 130/80. Higartil hevur markið verið 140/90, sum eisini er galdandi í evropeiskum londum.

Eftir nýggju leiðreglunum hava 46 prosent av vaksnum amerikanarum ov høgt blóðtrýst. Frammanundan var talið 32 prosent.

- Eingin ivi er um, at nýggja markið verður umstrítt, tí nógv fara helst at siga, at tað gongur illa at fáa hægra blóðtrýstið niður um 140, sigur Paul Whelton lækni á Tulane universitetinum.

Hann hevur verið limur í nevndini, sum hevur samtykt nýggju leiðreglurnar um blóðtrýst í USA.

Nevndin vísir á, at eingi prógv eru fyri, at eitt nú myrk sjokoláta, te, kaffi og yoga lækka blóðtrýstið í longdini.

Nýggju leiðreglurnar siga eisini, at fólk, sum hava diabetes, eiga at verða viðgjørd fyri ov høgt blóðtrýst, fer tað upp um 130.