Mistur kærurættur og dagstovnaráð í lógarbroyting

Um eina tíð missa fólk, sum eru sett hjá kommunum og arbeiða í dagstovni ella dagrøkt, rættin at kæra avgerðir um setan og starvsfólkamál til landsstýriskvinnuna í mentamálum.

Onnur, sum arbeiða hjá kommunum, hava ikki hendan møguleikan.

Tað er eitt politiskt ynski, at rætturin sambært galdandi lóg at kæra starvsfólkamál til Mentamálaráðið skal strikast, sigur Rigmor Dam, landsstýriskvinna.

Mentamálaráðið hevur hvørki fíggjarliga ella leiðsluliga ábyrgd av teimum, sum arbeiða í dagstovnum ella dagrøkt. 

Tað fer tó framvegis at bera til at kæra til Løgtingsins umboðsmann, Fasta gerðarrættin ella til dómsvaldið.

Dagstovnaráð

Mentamálaráðið hevur samstundis sent til hoyringar lógaruppskot um dagstovnaráð.

Ráðið skal geva kommunum ráð og vegleiðing um námsfrøðiligar spurningar, í staðin fyri sum nú, at landsstýrisfólkið í mentamálum ger tað. 

Í ráðnum vera sjey fólk, tvey fyri Kommunufelagið, tvey fyri Pedagogfelagið, tvey fyri Námsvísindadeildina á Fróðskaparsetrinum og eitt fyri Mentamálaráðið. 

Føroya kommunufelag verður skrivstova hjá Dagstovnaráðnum.

Hoyringarfreistin er til 11.desember.