Ingi skal venja grønlendingar í hondbólti

Ingi Olsen úr Vestmanna er settur sum venjari hjá grønlendska landsliðinum hjá monnum í hondbólti.

Hann tekur við eftir Niels Møller, boðar grønlendska hondbóltssambandið frá. 

Niels Møller gavst óvæntað sum venjari í síðstu viku eftir átta ár í sessinum. 

Hvørki hann ella grønlendska hondbóltssambandið vilja siga, hví Niels Møller er givin. 

Hann heldur tó fram við at arbeiða fyri hondbóltssambandið.

Ingi Olsen kennir væl grønlendska liðið, tí hann hevur verið hjálparvenjari hjá tí síðani 2014.

Ingi Olsen er eisini venjari hjá besta mansliðinum hjá VÍF.

Grønlendska landsliðið skal vera við í stóru PANAM kappingini næsta summar.