Listi yvir fólk sum kunnu mutrast í DK

Danska Fíggjareftirlitið hevur gjørt listan sambært eini nýggjari kunngerð, sum varð sett í gildi beint fyri ársskiftið. 

Kunngerðin áleggur millum annað Fólkatinginum, politisku flokkunum, Ríkisgrannskoðanini, ráðharrastovunum, dómstólunum og fyritøkum hjá tí almenna at koma við nøvnunum og upplýsingum um persónar í høgum embæti.

Á listanum standa til dømis allir limirnir í Fólkatinginum, ráðharrar, aðalstjórar, hægstarættardómarar, sendifólk á donskum sendistovum og nevndarlimir í eitt nú Danmarks Radio og DSB.

Tengt at lógini um hvítting

Endamálið við listanum er tengt at lógini um at hvítta pengar. Listin skal gera tað møguligt hjá fyritøkum og persónum, ið eru fevnd av lógini um hvíttan av pengum, at gera av, um teirra viðskiftafólk og samstarvsfelagar koma undir tað, sum í kunngerðini kallast politiskt eksponeraðir persónar. 

At fólk standa á hesum sonevnda listanum merkir ikki, at illgruni er um mutur. Tað merkir bara, at hesi fólkini eru í vanda fyri at taka ímóti mutri, tí tey sita í einum embæti, sum gevur teimum stórt vald.

Tá fólk fara úr embætinum, fara tey av listanum aftur. Fíggjareftirlitið hevur lagt listan á heimasíðuna.

Teir báðir føroysku fólkatingslimirnir, sum vórðu valdir á seinasta fólkatingsvali, Sjúrður Skaale og Høgni Hoydal, standa á listanum saman við donsku og grønlendsku fólkatingslimunum.