- Tíðindi, mentan og ítróttur
Sendistovan í Keypmannahavn ikki sett til viks
![](https://kvf.fo/sites/default/files/styles/grein-ovasta-mynd/public/nordurbryggjan.jpg?itok=0ul_hWdn)
Landsstýrið hevur onga ætlan um at lata sendistovuna í Keypmannahavn aftur, ella ikki at hava føroyskt sendifólk har.
Tað skilst á svarinum hjá Poul Michelsen, landsstýrismanni, til Edmund Joensen, løgtingsmann.
Poul Michelsen svarar, at skeiðið hjá virkandi sendimanninum í Keypmannahavn var úti á heysti í 2016.
Men avgjørt varð tá, ikki at seta nýtt sendifólk alt fyri eitt.
Sendimaðurin skuldi halda fram sum virkandi sendimaður, við bústaði í Føroyum og starvi í Uttanríkis- og vinnumálaráðnum. Hetta er ikki óvanligt.
Javnan í Danmark
Sendimaðurin er við jøvnum millumbili á sendistovuni í Keypmannahavn og røkir uppgávur og avgreiðir mál, sum starvið sum sendimaður krevur.
Harumframt samskiftir sendimaðurin regluliga við fólk, sum seta seg í samband við sendistovuna, sigur Poul Michelsen í svari sínum.
Hóast eingin sendimaður hevur verið staðsettur í Keypmannahavn í eina tíð, merkir tað ikki, at virksemið har er niðurlaðað, stendur í svarinum frá Poul Michelsen.
Sendistovan verður framhaldandi partur av uttanríkispolitiska virksemi Føroya fyri til fulnar at røkja føroysk áhugamál í Danmark.