Steintór heiðraður

Steintór Rasmussen varð í gjárkvøldið heiðraður við Listavirðisløn Nólsoyar Palls á tiltaki í Atlantis í Klaksvík. 

Heiðurslønin varð latin í sambandi við tiltakið Norðurljós, sum Klaksvíkar Kommuna skipar fyri. 

Undanfarin ár hava Hanus G. Johansen, Edward Fuglø og Eyð Matras fingið virðislønina, sum er 75.000 krónur. 

Í grundgevingini fyri at lata Steintóri Rasmussen virðislønina í ár verður sagt, at Steintór Rasmussen er ein fjølbroyttur listamaður, sum ikki avmarkar seg til eina listagrein. 

Steintór Rasmussen er mest kendur sum sangari og sangskrivari í bólkunum Frændir, Millum Frændir og Kular Røtir. Men seinastu árini hevur hann eisini latið tvær krimi-skaldsøgur úr hondum. 

Steintór Rasmussen er eisini ein av stigtakarunum til og fyriskiparunum av Summarfestivalinum.