Metlágt saltinnihald í havinum

Tá Havstovan fyri einum ári síðani gjørdi árið upp fyri 2016 sást, at saltinnihaldið á opnum havi, eins væl og á Landgrunninum, var metlágt frá septembur til desembur 2016. Nú eru seinastu mátingarnar fyri 2017 gjørdar upp sum vísa, at lága saltinnihaldið helt fram alt 2017.

Hetta skrivar Havstovan. 

Havstovan mátar hita og salt á opnum havi eftir sonevndum standardskurðum út frá Landgrunninum 3-4 ferðir um árið. Mátingarnar vísa, at miðal saltinnihaldið fyri 2017 var metlágt bæði vestanfyri, norðanfyri og eystanfyri. 

Saltinnihaldið í Banka-rennuni var metlágt á heysti 2016, meðan metlágt saltinnihald var mátað norðan fyri Føroyar á heysti 2017.

Meira er at lesa um hesar mátingarnar á heimasíðuni hjá Havstovuni sum er hav.fo.