Fyritøka í rættin fyri at bróta javnstøðulógina

Fyri fyrstu ferð er greinin í javnstøðulóginj frá 1994 um starvslýsing roynd í Føroya rætti.

Fútin er farin í rættin við einari fyritøku, sum Javnstøðunevndin meldaði fyri at søkja eftir einum manni at arbeiða í einari goymslu.

Kravið er sekt, sum er 5.000 kr. Fyritøkan, eitt smápartafelag í Havn, krevur frídøming.

Søkti eftir manni

Fyritøkan er meldað fyri at bróta javnstøðulógina, tí hon tvær ferðir í fjør á almennari heimasíðu søkti eftir manni, ikki eftir fólki, til goymsluna hjá sær.

- Hetta er so tungt arbeiði, at bara menn kunnu gera tað, søgdu bæði stjórin og nevndarforkvinnan í fyritøkuni í rættinum í dag. Arbeiðið er rætt og slætt ov tungt fyri kvinnur, søgdu tey. Tí varð søkt eftir manni. 

Tvey fólk, maður og kvinna, sum kortini ikki søktu um starvið í goymsluni, gjørdu Javnstøðunevndina varuga við lýsingina.

Málið er prinsipielt, tí einki fordømi er í Danmark heldur.

Dómur fellur í Føroya rætti um eina viku.