Kavbátamálið fyri landsrættin

Kærumálið móti 47 ára gamla dananum, Peder Madsen, sum er dømdur lívlanga fongsulsrevsing fyri at hava dripið svenska journalistin, Kim Wall, kemur fyri landsrættin í heyst.

Peder Madsen hevur skotið avgerðina um lívlangt fongsul inn fyri landsrættin, men tann parturin av dóminum, sum snýr seg um, at Peder Madsen er sekur í at hava dripið Kim Wall, er ikki kærdur.

Tí skal landsrætturin bara taka støðu til revsingina.

Landsrætturin hevur sett tríggjar dagar av at viðgera kærumálið, 5.,12. og 14. september.

Peder Madsen hevur alla tíðina noktað seg sekan í at hava dripið Kim Wall, men tað segði býarrætturin er lygn.

Rætturin segði, at tað er prógvað, at Peder Madsen gjølla legði til rættis, hvussu hann skuldi fara við Kim Wall, og síðani drepa hana.