Fær ikki skipað italsku stjórnina

Polittiskt órógv hevur verið í Italia síðani tjóðartingsvalið 4. mars, og nú arbeiðir Sergio Mattarella, forseti við eini ætlan um at tilnevna ein fyribils forsætisráðharra. Talan er um fyrrverandi stjóran í Altjóða Valutagrunninum, Carlo Contarella.

Í gjár gavst Giuseppe Conte at skipa stjórn, tí forsetin ikki gav honum loyvi at tilnevna Paolo Savona sum fíggjarmálaráðharra.

Savona er ímóti evruni sum gjaldoyra og atfinningarsamur ímóti Týsklandi.

Forsetin segði í gjárkvøldið, at Italia ikki kann hava ein fíggjarmálaráðharra, sum fer at virka fyri at strika evruna sum gjaldoyra. Tað ber snøgt sagt ikki til, segði hann.

Tað var annars semja ímillum Fimmstjørnurørsluna og høgraflokkin, Lega, um at skipa stjórn, men tá forsetin ikki vildi góðkenna fíggjarmálaráðharrin, datt hon niðurfyri.

Matteo Salvini, sum er formaður fyri Lega, hevur fyrr mælt til nýval, um forsetin ikki vil góðkenna ráðharrarnar.

Formaðurin í Fimmstjørnurørsluni, Luigi Di Maio, sigur, at tað ikki kann góðtakast, at forsetin vrakar ráðharrar.

Forsetin eigur at koma fyri ein ríkisrætt fyri sínar avgerðir, sigur hann við italskar miðlar.