Steingja moskur í Eysturríki

Tað skrivar AP-tíðindastovan. 

Eysturríki forsætisráðharrin, Sebastian Kurz úr konservativa fólkaflokkinum, ØVP,  hevur síðani valið í fjør lovað at føra strangari politikk viðvíkjandi tilflytarum. 

Millum annað hevur stjórnin lagt fram ætlanir um at minka um stuðulin til lívs-uppihald, so at flóttafólk bert kunnu fáa 563 evrur um mánaðin, ið eru góðar 4.200 krónur. Tilflytarar kunnu tó fáa hægri útgjald við at standa eina málroynd í týskum. Tá verður útgjaldið 6.400 krónur, ið svarar til minstu upphædd, sum aðrir borgarar í landinum fáa í dag.

Nú boðar stjórnin frá, at ætlanin eisini er at steingja í alt sjey moskur. Hetta kemst av, at stjórnin í 2015 samtykti at forbjóða átrúnaðarligum felagsskapum at móttaka stuðul frá útlandinum. 

Innanríkisráðharrin í Eysturríki, Herbert Kickl, sigur, at uppihaldsloyvir hjá umleið 40 imamum verða í løtuni viðgjørd, tí hesir móttaka stuðul frá AITB, sum er ein felagsskapur, ið varðar av turkiskum moskum í Eysturríki. Í tveimum førum eru uppihaldsloyvi longu ógildað.

- Politiskt islam og víðgongd rák hoyra ikki heima í Eysturríki, segði Kurz við AP-tíðindastovuna.

Forsetin í Turkalandi, Recep Erdogan, finst hvassliga at ætlanunum.

- Hetta er ein beinleiðis endurspegling av islamofobiska, rasistiska og diskreminerandi rákinum í Eysturíki. 

Talsmaðurin hjá turkiska forsetanum sigur á Twitter, at fleiri av ætlanunum eru í beinleiðis stríð við altjóða reglur um integratión og minnilutarættindi. 

Sum nógv onnur lond, tók Eysturríki eisini væl ímóti flóttafólkum, tá flóttafólkakreppan var í hæddini í 2015. Men hugalagið vendi brádliga, eftir at 150.000 flóttafólk søktu um friðskjól. Tað svarar til meira enn 1 % av fólkatalinum í Eysturríki.

Sambært eygleiðarum undir parlamentvalinum, sum var hildið tvey ár seinni, hevur integreringin ikki gingið væl, og valstríðið snúði seg í stóran mun um, hvussu kreppan varð handfarin, og at talið av muslimum í landinum var vaksið. 

Úrslitið var, at høgri-vongurin vann valið.

Síðani tá hava konservativi fólkaflokkurin, ØVP, og høgra-nationalistiski Frælsisflokkurin, FPØ, stýrt landinum við ætlanum um at herða tilflytara-politikkin.