PAZ hevur fingið tvær Michelin stjørnur

Í dag er triðju ferð at ein føroysk matstova fær altjóða viðurkenningina frá Michelin, og tað er eisini triðju ferð, at tað er við Poul Andriasi Ziska á odda.

KOKS fekk eina Michelin stjørnu í 2017, og matstovan slapp at varðveita hana árið eftir, tá árliga Michelin handbókin varð givin út aftur.
Í 2019 fekk KOKS enn eina stjørnu, og varð hendan varðveitt til juni 2024. Báðar stjørnurnar vóru mistar tá, tí KOKS ikki longur hevði fastan bústað.

Michelin skipanin er nevniliga skipað sum ein ferðahandbók, og stjørnurnar greiða frá hvar bestu matstovurnar í heiminum eru. Uttan bústað ber hetta sostatt ikki til.

Í dag varð tað matstovan PAZ ið fekk henda stóra heiður. Matstovan opnaði í Havn fyri almenninginum 9 apríl, og hevur matstovan sostatt bert verið opin í umleið tveir mánaðir.

Starvsfólkini í matstovuni hava í dag stákast, ímeðan høvuðskokkurin Poul Andrias Ziska er í Danmark, til viðurkenda árliga Michelin tiltakið, har stjørnurnar verða handaðar.

At verða boðin til tiltakið ber við sær, at man kann vera í boðið at fáa stjørnu ella heiður á ymsan hátt, og starvsfólkini hjá PAZ hava tí væntað, at okkurt stórt fór at henda. 

Í innslagi í Degi og viku fylgja vit starvsfólkunum allan dagin, heilt til at tey fáa boðini, at PAZ ikki bara fekk eina, men heilar tvær Michelin stjørnur.