Heita vatnið í Eysturoyartunlinum ein vatngáta

Jarðfeingi hevur verið í Eysturoyartunlinum og gjørt kanningar í samband við, at arbeiðsmenn í mai mánaða rendu seg í heitt vatni í tunlinum. 

Men tað hevur ikki borið til hjá Jarðfeingi at sleppa nóg nær staðnum, har heita vatnið spríkti uppúr, soleiðis at til bar at kanna vatnið.

- Tilfar var lagt út yvir botnin til koyribreyt beinavegin aftaná, at arbeiðsmenninir bóru við vatnið. Tað skrivar Jarðfeingi á heimasíðuni. 

Jarðfeingi fer tó at royna aftur um eitt ár ella so, tí tá skulu ymiskar innleggingar gerast í tunlinum, botnurin reinsast og endalig koyribreyt leggjast á, og tá verður møguligt hjá Jarðfeingi at sleppa betri framat staðnum.

Kanningarnar higartil geva tó ongar ábendingar um óvanliga heitar umstøður nærindis staðnum, har fyribrigdið sambært arbeiðsmonnunum var, skrivar Jarðfeingi á heimasíðuni.

Jarðfeingi hevur áhuga fyri vatninum í Eysturoyartunlinum, tí tað kann hava samband við heita vatnið í Kollafirði. 

Keldan í Eysturoyartunlinum kann møguliga vátta eina hypotesu um, at heita vatnið í Kollafirði kemur frá langari rivu, sum gongur tvørtur um fleiri oyggjar. 

Fleiri líknandi rivuskipanir við heitum vatni kunnu vera í Føroyum, og hesar kunnu í framtíðini brúkast sum orka, um so er, at tær eru varandi. 

Leysligar metingar hjá Jarðfeingi vísa, at orka er í heita vatninum í Kollafirði til at hita 150 vanlig sethús, um hitapumpuskipan verður nýtt.

Sum nú er, rennur vatnið á sjógv.