Nýggj kanning: karakterstremban forðar fyri læring

Leggur tú ov stóran dent á próvtøl, kann tað forða fyri læring, trivnað, hugdýping og fakligheit.

Tað vísir ein nýggj frágreiðing frá Center for Ungdomsforskning á Aalborg Universiteti, skrivar Jyllands-posturin.

Frágreiðingin byggir á granskingarúrslit og samrøður við lærarar og næmingar á 13 úrvaldum donskum miðnámsskúlum.

Kanningin vil vera við, at nakrir næmingar til dømis aftra seg við at rætta hondina upp og seta býttar spurningar, tí teir halda, at tað kann forða fyri at fáa próvtalið 10 ella 12.

Í staðin siga næmingarnir heldur tað, sum teir halda, lærarin vil hoyra - og kenna teir ikki svarið, tiga teir heldur enn at spyrja.

Hetta er ikki gott fyri undirvísingar- og læruumhvørvið, sigur Noemi Katznelson, professari, sum er leiðari fyri Center for Ungdomsforskning við JP:

"Próvtals-strembanin viðførir eina ógvuliga strategiska tilgongd hjá næmingunum. Teir hugsavna seg rætt og slætt um at fáa bestu próvtølini. Teir vilja vísa læraranum og látast, at teir eru áhugaðir og duga eitt fak, sigur Noemi Katznelson.

Frágreiðingin vísir eisini, at karakterstrembanin kann føra til eina avriks- og perfektiónsmentan, har nakrir næmingar verða sæddir sum vinnarar og aðrir sum taparar, tí ein miðalgóður karakterur ikki er nóg góður.

Center for Ungdomsforskning mælir við støði í frágreiðingini til, at ein nevnd verður sett at endurskoða og broyta skipanina við karakterum.