Landslæknin ávarar móti meslingum

Lars Fodgaard Møller, landslækni, sigur á heimasíðuni hjá landslæknanum, at fyrra hálvár í ár eru 41.000 tilburðir av meslingum fráboðaðir í Evropa. Tað eru 17.000 fleiri enn alt árið í fjør. 

Landslæknin mælir fólki til at lata seg vaksinera, eru tey ikki mótstøðufør móti meslingum, fara tey uttanlands.

Fólk eru mótstøðufør móti meslingum, um tey longu hava havt meslingar ella hava fingið MFR vaksinasjón.

Fólk kunnu rokna við, at eru tey fødd fyri 1975, so hava tey havt meslingar og eru mótstøðufør.

Tey, sum hava fingið MFR vaksinina, eru eisini mótstøðufør.

MFR vaksinasjón verður givin í barnavaksinasjónsskránni. Hon verður givin 15 mánaða gomlum børnum, og tá børnini eru fýra ár.

Hava fólk ikki fingið MFR vaksinasjón og ikki hava havt meslingar, eiga tey at seta seg í samband við kommunulæknan, mælir landslæknin til.

Serliga eru meslingar í Rumenia, Grikkalandi, Fraklandi, Italia, Ukreina og Russlandi.