33 ára gamli maðurin játtar seg nú sekan

Málið verður tí koyrt í rættin sum játtanarmál. Tá so er, verður einki ákærurit skrivað, men í staðin skrivlig skuldseting, sigur Linda Hesselberg, varafúti.

33 ára gamli maðurin er eisini skuldsettur fyri at hava víðarisent myndir og filmar av óvanliga grovum slag. Maðurin hevur ikki framleitt tilfar sjálvur, sigur Linda Hesselberg, varafúti.

Tað er National Cyber Crime Center í Danmark, sum boðaði løgregluni í Føroyum frá um málið. 

Upprunaliga noktaði maðurin seg sekan í at hava myndir av allar grovasta slag. Verjin hjá manninum bað um at síggja próvtilfarið og gjøgnumganga tað saman við manninum. Og tað hava tey rætt til, og tað verður gjørt saman við ákæruvaldinum og løgregluni, sigur Linda Hesselberg. 

Eftir tað boðaði verjin frá, at maðurin játtar seg sekan í skuldsetingunum.

Sum sagt, - einki ákærurit verður skrivað, men nú verður áheitan um rættarfund send Føroya rætti saman við skrivligari skuldseting.

Tá verða eingi vitni avhoyrd, eingin próvførsla verður, men prógvini skulu dokumenterast, so at dómarin sær, at játtanin er grundað á tilfarið.

Nú fer ákæruvaldið at kanna líknandi dómar.

Linda Hesselberg vil ikki siga, hvørja revsing ákæruvaldið fer at krevja, men talan verður um stranga fongsulsrevsing, og pástandur um revsing verður ikki niðanfyri tvey ár.

Hon vísur á, at kynsligur ágangur steðgar vanliga, tá skemmarin verður tikin, men í hesum førinum er støðan ein heilt onnur.

- Tá metast skal um revsingina, so taka løgregla og ákæruvaldið við í metingina, at talan er um myndir og filmar, sum fara at ferðast á netinum - eisini um nógv ár. Og tá hesi børn verða vaksin, kunnu tey koma at standa andlit til andlits við myndirnar. Onkur hevur framleitt hvørja einastu av hesum myndum og filmum, tí ein marknaður er fyri hesum. Myndirnar og filmarnir eru til á netinum og verða áhaldandi deild á netinum. Og hvørja fer onkur tekur niður og hyggur at hesum tilfari, er talan um kynsligan ágang. Tí verður revsingin grundað á, at tað at deila myndirnar við onnur, er tað sama sum áhaldandi kynsligur ágangur, sigur Linda Hesselberg, varafúti.

Enn er ikki ásett, nær rættarfundurin verður.