Fýra kunnu blíva ársins ítróttanavn

Signhild Joensen, Torkil Veyhe, Hávard Vatnahamar og fimleikaliðið, Vípan, eru innstillað til at blíva ársins ítróttanavn 2018.

ÍSF hevur innstillað tey fýra. Í vikuni skulu ítróttarjournalistar atkvøða um, hvør skal fáa heiðurin.

Vinnarin verður avdúkaður til tiltak, sum ÍSF skipar fyri í Smæruni í Havn. Innstillingarnar hava hesar grundgevingar:

Signhild Joensen:
- Fyri á EM í Glasgow í august 2018 at vera einans 38 hundraðpartar, ella éina plasering, frá hálvfinaluni í 200 metra ryggsvimjing

- Fyri sítt silvurheiðursmerki í 200 rygg á 8 Trofeo Citta di Milano í mars 2018

- Fyri sítt bronsuheiðursmerki í 200 rygg á 27e Meeting International de Saint-Dizier í oktober 2018

- Fyri síni 2 gull og 1 silvur í 50, 100 og 200 rygg í opnu kappingini á Bergen Swim Festival í apríl 2018

- Signhild svam seg í 2017 við 2:14.01 í 200 rygg undir B-kravtíðina hjá FINA á 2:14.30 til OL 2020 í Tokyo, og prógvaði aftur í 2018 at hon er ein hin frægasti kandidaturin hjá føroyingum til OL 2020, við 2:14.99 á Bergen Swim Festival 2018.

Torkil Veyhe:
- Tíðliga í fjør bleiv Torkil kosin sum mest álopssinnaði súkklarin í allari kappingini, tá seks daga kapingin Tour de Normandie endaði í Caen.

- Í juni fekk hann kanska sítt besta úrslit, tá hann gjørdist næstur um málstrikuna í fyrstu etapu av Ronde de l´Oise. 

- Í 2018 skrivaði Torkil undir sáttmála við PRO kontinentalliðið Riwal-CeramicSpeed

Vípan:
- Estetiska unglingaliðið Vípan hjá Støkk megnaði í 2018 at gera seg galdandi á altjóða pallinum, tá tær gjørdust nr. 10 til HM í Estetiskum fimleiki, sum varð hildið í Budapest.

At gerast millum 10 tey bestu unglingaliðini í heiminum er ikki komið av sær sjálvum, tí hetta liðið hevur vant sera hart og miðvist saman síðani 2013, soleiðis at tær kunnu kappast við tey bestu úti í heimi.

- Estetiski fimleikurin kom á fyrsta sinni til Føroyar fyri knapt 15 árum síðani, og tað er at frøðast um, at vit nú eru komin hartil, at vit kunnu bjóða heimselituni av.

Hávard Vatnhamar:
- Hávard Vatnhamar hevur seinastu tvey árini arbeitt miðvíst fram ímóti einum paratriatlon startplássi á Paralympisku leikunum í Tokyo í 2020

- Hávard er seinasta árið klatraður uppá 16. pláss á heimsrankinglistanum fyri Paratriatlon íðkarar, eina løtu í 2018 var hann á 15. plássi.

- Besta úrslit hansara í 2018 var gerast nr. 2 í world cup kapping í Magog i Kanada, men Hávard var eisini nr. 1 í Fyn Duatlon world championships, og nr 2 í FM í triatlon (ikki paratriatlon). 

- Hávard er ein stór fyrimynd fyri føroyska paraítrótt, bæði við sínum kappingarvilja og sínari jaligu og professionellu tilgongd til ítróttin.