Fleiri gistu í Føroyum

Meira enn sjeytúsund fólk fleiri gisti á føroysku  gistingarhúsunum í fjør í mun til árið fyri. Tað vóru 151.717 skrásettar gistinætur í gistingarhúsum í 2018. Tað eru 7.243 ella 5% fleiri enn í 2017, skrivar Hagstovan á heimasíðuni.

31% av gistingunum vóru hjá ferðafólki úr Danmark, 21% úr Føroyum, 20% úr øðrum Norðurlondum, onnur 20% úr øðrum londum í Evropa, og tey síðstu 8% vóru hjá fólki úr londum uttan fyri Evropa.

Í ár hendi eisini ein merkisverd broyting í samansetingini av gestunum, har talið av teimum við starvsferðarørindum vaks við 52%, meðan tey, sum gistu við frítíðarendamáli, vóru 18% færri.

Tølini eru bara fyri gistingar á gistingarhúsum, ikki fyri tey, ið gista í húsum, íbúðum, ból og bita ella Airbnb.