Fáa meirvirðisgjaldið aftur í fimm ár afturat

Felagsskapir, stovnar og grunnar fáa nú fimm ár afturat uttan meirvirðisgjald, tá tey byggja.

Uppskot er sent til hoyringar um at broyta lógina um meirvirðisgjald, so undantøkan, sum skuldi fara úr gildi 31.desember í ár, verður galdandi í fimm ár afturat, til 31.desember í 2024.

Felagsskapir, stovnar og grunnar, sum gera íløgur í ikki vinnuligt, almannagagnligt frítíðarvirksemi, skulu tó rinda meirvirðisgjald í landskassan.

Men tey fáa allar pengarnar aftur, um tey søkja um teir frá Taks.

Treytin

Treytin er tó, at íløgan er yvir eina millión krónur, og í minsta lagi triðingurin er gáva ella innsavnaður peningur við óløntum og sjálvbodnum arbeiði.

Undantøkan er galdandi fyri til dømis ítrótt, mentan og átrúnað.

Hoyringarfreistin er eisini í hesum førinum stutt, hon er fýra dagar, til í morgin.

Meirvirðisgjaldsundantøkan kom í 2010, men lógin er longd nakrar ferðir síðani tá, seinast í fjør.