Fiskiorkan bleiv ikki broytt kortini í kunngerðini

Fiskiorkan hjá línuskipum er óbroytt, nú kunngerð um áseting og útrokning av fiskiorku í sambandi við avhending og flyting av fiskidøgum og broyting av fiskifari er komin í gildi.

Høgni Hoydal, landsstýrismaður, ætlaði at broyta orðingina um línuskip frá 600 og størri til 600 til 2.772.

Hetta er metingarvirðið, sum verður brúkt, tá fiskidagar skifta eigara.

Metingarvirðið er longdin ganga breiddin ganga dýptin.

Men orðingin er óbroytt, tað er 600 og størri, í kunngerðini.  

Eingin forðing

Fiskiorkan 2.772 er størsta línuskip í Føroyum pluss tíggju prosent.

Fiskivinnuráðið mælti frá at gera broytingina, tí hon hevur álvarsamar avleiðingar fyri tey reiðarí, sum hugsa um at keypa brúkt línuskip, sum tó eru nýggjari enn verandi skip.

Broytingin merkir, sigur Fiskivinnuráðið, at skip størri enn 2.772 ikki kunnu fáa fiskidagar og hava als ikki atgongd til fiskidagaskipanina.

Fiskivinnuráðið vísti á, at broytingin kann vera ein forðing fyri, at línuflotin verður endurnýggjaður.

Hesum vísir Høgni Hoydal aftur. Ætlaða broytingin forðar ongum í at fáa sær skip, sigur hann.

Men nú kunngerðin er lýst, er orðingin um línuskip tann sama, sum hon hevur verið.