Kæran tikin aftur

Kæran um biogassverkið, sum verður bygt á Skarðshjalla, er tikin aftur.

Eigarafelagið Hoyvíkshædd, sum er býlingurin norðan fyri skúlan við Løgmannabreyt í Hoyvík, kærdi um staðsetingina og um vandan fyri lukti frá verkinum.

Kæran varð send landsstýriskvinnuni í umhvørvismálum, Sirið Stenberg, sum skuldi taka avgerð um hana.

Men tí sleppur hon undan, tí kæran er tikin aftur.

1,8 kilometrar eru millum Hoyvíkshædd og biogassverkið, upplýsir Umhvørvisstovan.

Borgarafundur hevur verið um biogassverkið.

Førka byggir

Partafelagið Førka, Føroysk náttúrorku, er farið undir at byggja biogassverk á Skarðshjalla í Hoyvík.

Biogassverkið hjá Førka, sum er dótturfelag hjá Bakkafrosti, fer at taka neytamykju frá landbúnaðinum og súrløgu av laksi og skarni frá smoltstøðum. 

Verkið fer at hava gassmotor, sum ger ravmagn burtur úr biogassinum so hvørt. 

Hitin frá gassmotorinum kann brúkast til fjarhita ella til onnur endamál. 

Harafturat kann viðgjørda tilfarið brúkast sum tøð í landbúnaðinum.