Heimir gevst í HB

Morgunblaðið ber hesi tíðindini í dag. Sambært íslendska miðlinum er familjan hjá Heimir flutt aftur til Íslands og Heimir sjálvur ger tað sama, tá landskappingin her heima endar í oktober.

Heimir Guðjónsson vann í fjør bestu føroysku fótbóltsdeildina hjá monnum, umframt at hann førdi HB í steypafinaluna, sum HB tapti í móti B36.

Í ár hevur hann aftur leitt HB í steypafinaluna, meðan liðið liggur nummar fýra í landskappingini í løtuni.

Kaj Leo Holm Johannsen, formaður í HB, sigur, at hann vil hvørki vátta ella avsanna tíðindini í Morgunblaðnum.

Sáttmálin við Heimir Guðjónsson gongur út, tá kappingin endar í ár, men HB vil fegið leingja sáttmálan við íslendska venjaran.