Upprunafólk kroyst: børnini hava tørv á Amasona

Teir nógvu skógareldarnir í Amasona ávirka trø, djór og fólk. Tað skrivar DR. 

Við bleytum pinnum og berum hondum mála limir í Mura-ættini reyðlittar strikur á kjálkar, nøs, pannu og búkin. Tey taka boða og píl í hond, tí nú fara tey at berjast fyri at verja sítt heim í Amasonskóginum. 

Amasonskógurin brennur, men fyri upprunafólkið er Amasonas meira enn ein skógur. Tað er teirra heim. 

-Fyri hvønn dag sum fer, síggja vit hvussu skógurin verður oyðilagdur: avskóging, innrásir og trø verða feld. Vit eru kedd um, at skógurin doyr. Vit merkja veðurlagsbroytingarnar, og heimurin og børnini hava tørv á skógini. Tað sigur Andech Wakana, sum er ein av leiðarunum hjá Mura-fólkinum, við Reuters. 

Mura-ættin telur 15.000 fólk, og tætt við teirra bygd í Amason-lendinum hava maskinur sett síni spor í stórum økjum, sum eru avskógaði. 

-Vit síggja hvussu trøðini eru feld og vit síggja alt sum er oyðilagt. Okkara mál er at verja okkara øki, náttúru, trø og djór, sigur Andech Wakana. 

Skógarruddingin, sum skal fremja landbúnaðin og námsvinnuna, er ein stórur trupulleiki í Amasonas. Amason-skógurin verður ofta kallaður "heimsins lungu". Upprunaliga var skógurin 4 milliónir ferkilometrar, og sambært The Economist eru 800 túsund av hesum ferkilometronunum nú burtur. 

En lættur máti at beina fyri skóginum er at brenna hann. Og hetta hendir í stóran mun hesar dagarnar. Hesa árstíðina eru vanliga nógvir skógareldar í Amasonas. Men í ár eru skógareldarnir tvífaldaðir. 

Síðani týsdagin eru fleiri enn 10 túsund nýggir eldar ásettir, skrivar DR.