ST: 2019 næstheitasta árið higartil

Heimsveðurstovnurin váttar, at 2019 var næstheitasta árið á jørðini, sum er mátað higartil. Bara 2016 var heitari, millum annað tí, at veðurfyribrigdið, El Niño, var virkið.

– Miðalhitin kring knøttin var 1,1 stig hægri enn miðaltalið fyri seinnu hálvu av 19. øld, sigur Petteri Taalas, aðalskrivarin í veðurstovninum hjá ST, sambært DR.

World Meteorological Organization hjá Sameindum tjóðum sigur, at heita veðrið fer at halda fram, og ávarar um óvanligt veður í ár og í framtíðini.

– Við mongdini av vakstrahúsgassi, sum kemur út í løtuni, eru vit á veg móti heitari tíðum, og tað verða millum trý og fimm stig heitari hesa øldina, sigur aðalskrivarin í heimsveðurstovninum.