Nýtt felag skal bøta um korini hjá børnum

Í kvøld verður Landsfelagið børn og samvera stovnað. Endamálið hjá felagnum er at bøta um korini hjá børnum, hvørs foreldur ikki búgva saman.

Landsfelagið børn og samvera verður systurdeild hjá danska felagnum Landsforeningen Børn og Samvær. Landsforeningen Børn og Samvær tekur støði í barnsins sjónarhorni, sum ikki tekur atlit til mammuna ella pápan.

Varpa ljós á lóggávuna

Landsfelagið børn og samvera fer at arbeiða fyri, at samvera og samskifti hjá børnum við foreldur teirra altíð verður við barnsins tørvi í miðdeplinum. 

Felagið fer eisini at varpa ljós á lóggávu, sum hevur óhepna ávirkan á børnini, og ætlanir eru um at gera eitt netverk fyri útsett børn og foreldur teirra.

Tað siga tey, sum skipa fyri stovnandi aðalfundinum í kvøld klokkan 19 í húsinum hjá Havnar Arbeiðarafelag á Tinghúsvegnum. Foreldur eru vælkomin at hava børn við á fundin, siga tey.