Havbúnaðarfelagið: Taðing dálkar vøtn og firðir

Fleiri ferðir seinastu árini hevur taðing dálkað áir, vøtn og firðir. 

Tað sigur Havbúnaðarfelagið, sum hevur ummælt uppskotið um broyting í taðingarkunngerðini.

Havbúnaðarfelagið tekur undir við at geva undantaksloyvi til at taða um veturin.

Men tað skal tó vera, tá lítil vandi er fyri, at taðingin elvir til alguvøkstur á firðunum. 

Eisini er frægari at taða, tá alibrúk liggur brakk, enn tá fiskur er í ringunum. 

Herða eftirlitið

Havbúnaðarfelagið heldur, at eftirlitið við, at kunngerðin verður hildin, eigur at verða hert.

Og Búnaðargrunnurin kann veita fígging til tangar at hava tøð í.
 
Havbúnaðarfelagið sigur, at skipanin við undantaksloyvum eigur at fara úr gildi aftur um tvey ár. 

Tá er biogassverkið farið í gongd og nóg nógvir tangar eru, sigur felagið.

Kommunur skulu spyrja

Tað eigur at vera kravt, at tá kommunan viðger umsóknir um undantaksloyvi, skal hon spyrja fólk, fyritøkur og onnur, sum  avgerðin um undantaksloyvi til at taða ávirkar.

Uppskotið er, at loyvt verður at geva undantaksloyvi til at taða í ótíð.

Loyvt er í løtuni at taða frá 15.mars til 15.oktober.

Men nú verður kunngerðin um taðing broytt, so kommunur kunnu geva undantaksloyvi til taðing millum 15.oktober og 15.mars.