Grønlandsbankin rindar einki vinningsbýti

Grønlandsbankin hevur boðað keypsskálanum í Keypmannahavn frá, at hann fer ikki at rinda vinningsbýti fyri 2019 kortini.

Ætlanin var at gjalda partaeigarunum 54 mió. kr. í vinningsbýti, 30 kr. fyri partabrævið.

Orsøkin til broytingina er koronasmittan.

Bankin vil heldur styrkja seg við teimum 54 milliónunum, í staðin fyri at lata tær í vinningsbýti.

Hann fer at kunna geva fleiri lán og verður betur førur fyri at standa móti tapum, verður sagt.

Avlopið minkar

Grønlandsbankin hevur broytt væntanina fyri 2020 úr 120 til 140 mió. kr. í yvirskoti til 80 til 130 milliónir. 

Nevndin í Grønlandsbankanum hevur tó ikki heilt slept vinningsbýtinum fyri 2019.

Tað kemur kanska afturíaftur á einum eykaaðalfundi seinni í ár, um koronastøðan batnar nógv.