Spýtti eftir løgreglumanni

Grundlógaravhoyring verður í Føroya rætti í dag, har ein útlendskur maður er skuldsettur fyri at hava hótt ein annan persón og fyri harðskap móti tænastumanni. 

Tað var seinnapartin í gjár, at løgreglan fekk fráboðan um, at ein maður hevði hótt við, at hann fór at taka lívið av einum persóni.

Maðurin skal hava borið hóttanina fram fyri einum persóni, um ein triðja persón, sum ikki var hjástaddur.

Av tí, at viðkomandi hevði knív uppi á sær, tá hann bar fram hóttanina, varð mett, at støðan var so mikið álvarsom, at tveir løgreglubilar vórðu sendir á staðið. 

Tá løgreglan kom til bygdina, var neyðugt at leita eftir manninum, ið var farin víðari og gekk millum nøkur hús. 

Tað eydnaðist at finna mannin, ið varð handtikin á staðnum. 

Tá hann varð handtikin, spýtti hann á ein løgreglumann, og verður tí eisini skuldsettur fyri harðskap móti einum tænastamanni. 

Eldur í bingjum
Annars hevur talan verið um eina rættiliga friðarliga nátt hjá løgregluni. 

Boð vóru kortini eftir teimum í gjárkvøldið, tá eldur kyknaði í tvær bingjur, ið stóðu í grótbrotinum í Sandavági. 

Vitni sóu tveir skutarar fara av staðnum, og seinni um kvøldið fekk løgreglan eisini fatur á øðrum av førarunum.

Talan var um ein ungan drong, ið nú er skuldsettur fyri at hava sett eld á bingjurnar.