NSÍ laðar garðar

Runavíkar kommuna og NSÍ hava gjørt eitt serligt tiltak fyri teir 25 menninar í besta liðnum hjá NSÍ.

Teir skulu laða garðar, og fáa pengar frá kommununi afturfyri. NSÍ hevur ikki brúkt møguleikan at senda sínar spælarar í lønarískoytisskipanina hjá Als.

Og tað hevði ikki munað nógv, tí leikararnir fáa tað mesta av sínari inntøku aðrastaðni enn fyri at spæla fótbólt.

Gomlu grótgarðarnir laðast uppaftur

Liðskiparin á besta mansliðnum hjá NSÍ, Klæmint Andrasson Olsen, spurdi borgarstjóran í Runavík, um kommunan kundi lata leikararnar fáa okkurt at gera fyri at hjálpa felagnum. 

Men nú vóru góð ráð dýr. Hvussu kunnu 25 mans arbeiða saman, og tveir metrar eru millum teirra? Jú, teir kunnu laða gomlu grótgarðarnar uppaftur.

Leikararnir brúka nakrar leygardagar til arbeiðið at fáa garðarnar í upprunastand aftur, so frægt, sum tað ber til. 

Av tí, at vit eru í einum fíggjarári, verður hetta ein royndarskipanin, sum verður fíggjað umvegis kontuna, sum eitur fornminni.