Aftur í uppskoti at fáa Reumert-virðisløn

Sjónleikarin, Olaf Johannessen, er aftur í uppskoti at fáa Reumert-virðislønina.

Talan er um mest viðurkendu virðisløn, ið verður latin fyri palllist í Danmark.

Merkisvert er, at Olaf Johannessen er í uppskoti saman við Jens Albinus fyri leiklutirnar sum tvíburar í eini skaldsøgu eftir Agota Kritof. Hesin leikur varð pallsettur í Husets Teater.

Tað er í flokkinum Ársins mannligi høvuðsleikari, at Olaf Johannessen og Jens Albinus eru í uppskoti saman. Hinir báðir, sum eisini eru í uppskoti í sama flokki, tó hvør sær, eru Jacob Madsen Kvols og Ulver Skuli Abildgård.

Vunnið tvær ferðir fyrr

Í 2015 og 2016 vann Olaf Johannesen somu virðisløn, hann nú er í uppskoti at vinna, og í 2018 vann hann Heiðursvirðislønina hjá Reumert.

Tey, sum eru í dómsnevndini, eru 12 fakfólk og ummælarar. 

Reumert-virðislønirnar verða latnar 21. september.