Sí tølini: Útflutningurin minkar

Føroyar útfluttu fisk fyri 869 milliónir krónur í januar í ár, og útflutningurin minkaði niður í 465 milliónir krónur í apríl, vísa tøl frá Hagstovuni.

Sammett við árið í fjør, er afturgongdin serliga stór í apríl. Føroyar útfluttu fisk fyri 696 milliónir krónur í apríl í fjør.

Koronasmittan fór at breiða seg í Evropa í februar, og fleiri lond settu tiltøk í verk í mars.

Vinnuhúsið skrivar á heimasíðuni, at eftirspurningin og harvið útflutningin av føroyskum, feskum hvítfiski og saltfiski, er serliga ávirkaður av, at matstovur úti í heimi hava stongt.

Orsøkin til minkaða eftirspurningin er kortini ikki bara korona. Føroyski fiskurin hevur verið serliga rak seinastu tíðina, og tað hevur helst eisini ávirkað eftirspuringin, sigur Bogi Nielsen, stjóri í Faroe Ship, við heimasíðuna hjá Vinnuhúsinum.

Útflutningurin til Bretlands hevur verið nakað ójavnur fyrstu mánaðirnar í ár.

Útflutningurin til Russlands og USA er hinvegin minkaður støðugt seinastu mánaðirnar.

Útflutningurin til Kina minkaði í stórum í februar, men tók spakuliga dik á seg aftur í mars og apríl.

Útflutningurin til Danmarkar, Spania, Frakland og Týskland hevur hinvegin verið nakað ójavnur higartil í ár.