Landslæknin vildi hava ávís starvsfólk kannað

Full semja var ikki millum landslæknan og farsóttarnevndina um tilmælið, sum varð latið landsstýrinum, tá loyvt bleiv at ferðast til Týsklands, Bretlands og Noregs og til Føroya úr hesum londum 15.juni.

Landslæknin, sum er í farsóttarnevndini, var ikki við á fundinum hjá nevndini tann 8.juni.

Men hann sigur í telduposti til stjóran á Løgmansskrivstovuni dagin eftir, at hann hevur viðmerkingar um tað, sum nevndin bleiv samd um.

Skulu kannast

Lars Fodgaard Møller sigur, at hann heldur, at allir føroyingar og onnur, sum koma uttaneftir, og skulu til arbeiðis á einum stovni ella í einum skúla, skulu kannast fyri koronu, áðrenn tey fara til arbeiðis.

Kanningin skal gerast í fyrsta lagi tveir dagar, áðrenn fólk fara til arbeiðis.

Tveir dagar eftir fundin skrivar landslæknin í telduposti til Heilsumálaráðið, at hann mælir til tíggju daga sóttarhald, tó uttan at kalla tað sóttarhald.

Annars sigur landslæknin, at hann tekur undir við tilmælunum hjá farsóttarnevndini.