8.200 tons til ískoytiskvotur

Tøka nøgdin til vinnuligar royndir og verkætlanir er 4.260 tons av makreli og 8.095 tons av norðhavssild.

Til ískoytiskvotur eru 2.840 tons av makreli og 5.397 tons av norðhavssild. Tilsøgn kann latast um kvotur í fimm ár, men fiskiloyvi verður tó bara latið í eitt ár í senn.

Freistin at søkja um makrel og sild til vinnuligar royndir og verkætlanir og sum ískoytiskvotur er til mánadagin 10. august á middegi.

Ískoytiskvotan skal bøta um raksturin

Tey, sum søkja um ískoytiskvotu, skulu prógva, at kvotan veruliga kann bøta um raksturin hjá skipinum, sum skal fiska kvotuna.

Tað er ikki ein avgjørd treyt fyri at fáa ískoytiskvotu, at fiskifarið, sum søkt verður um ískoytiskvotu til, hevur veiðiloyvi.

Kvotur, sum verða latnar til vinnuligar royndir og verkætlanir, skulu menna og nýskapa tøkni og mannagongdir og virðisøkja fiskin. Fiskurin kann virkast umborð ella í landi.