Russar órógva bretsk val

Tað sigur ein frágreiðing frá fregnar- og trygdarnevndini, sum júst er almannakunngjørd. Tað skrivar bretska kringvarpið, BBC.

Frágreiðingin, sum hevur verið á veg leingi, skuldsetir fleiri av seinastu stjórnunum í Bretlandi fyri at taka ímóti russisku oligarkunum við opnum ørmum, og fyri at gera ov lítið fyri at steðga russiskari ávirkan í Bretlandi.

Nevndin finst eisini at stjórnini fyri at hava seinkað kunngerðini av frágreiðingini. Teim skuldsetingunum hevur stjórnin fyrr víst aftur.

Nógv evni nevnd í frágreiðingini

Á tíðindafundi, har frágreiðingin varð løgd fram, fanst ein av limunum í nevndini, Kevan Jones, hvassliga at forsætisráðharranum, Boris Johnson, tí hann ikki hevur góðkent frágreiðingina fyrr.

Frágreiðingin fevnir um nógv evni, millum annað falsupplýsingarherferðir og russar í útlegd í Bretlandi. Stórur partur av frágreiðingini verður ikki almenn, tí ótti er fyri, at Russland kann nýta prógvini at hótta Bretland við.

Frágreiðingin staðfestir, at Bretland er eitt mál fyri russiskum falsupplýsingarherferðum, serliga undan valum, men sigur, at eingin vil gera nakað við málið.