Aftur ein danskur ráðharri í Grønlandi

Danski uttanríkisráðharrin, Jeppe Kofod, er í Grønlandi nú um vikuskiftið.

Endamálið við ferðini er at styrkja sambandið millum Danmark og Grønland, sigur hann.

Kannast skal, hvussu Grønland kann fáa størri lut í trygdarpolitikkinum og verjupolitikkinum hjá danska ríkinum.

Jeppe Kofod og Sten Lynge, landsstýrismaður, skulu millum annað hitta uttanríkis- og trygdarpolitisku nevndina hjá landstinginum. 

Jeppe Kofod og Sten Lynge hittust eisini fyri einum mánað síðani, tá Mike Pompeo, uttanríkisráðharri í USA, var í Keypmannahavn.

Arktis frammarlaga

Arktis og ríkisfelagsskapurin er frammarlaga í raðfestingini hjá Jeppe Kofod.

Seinna hálvár verður nýggja arktiska stategiin hjá danska ríkinum fyri árini 2021 til 2030 gjørd liðug. Hon verður kunngjørd fyrst í 2021.

Uttanríkismálaráðið sigur, at Jeppe Kofod kemur til Føroya í næstum.

Hann hevur júst verið í Noregi, har umboð fyri Grønland var við á fundum um Arktis.

Danski verjumálaráðharrin, Trine Bramsen, var í Grønlandi fyrst í august.