Norskt farmaskip tekur fiskin hjá Yantarnyy

Klokkan seks í morgun kom norska frystifarmaskipið, Silver Copenhagen, til Havnar eftir fiskinum hjá russiska trolaranum, Yantarnyy.

Silver Copenhagen liggur uttan á Yantarnyy og tekur fiskin hjá trolaranum.

Yantarnyy hevði annars fingið loyvi til at leggja fiskin í frystigoymsluna í Ánunum í Klaksvík.

Men nú verður hann lossaður umborð á Silver Copenhagen við nýggju bryggjuna í Havn.  

Kom á Havnina týskvøldið

Yantarnyy kom á Havnina týskvøldið 8.september.

Hann fór av Oyrareingjum 1.september í Nólsoyarfjørð at leggja seg. Yantarnyy kom á Oyrareingir 23.august eftir at hava verið til fiskiskap norðanfyri.

Eitt frystifarmaskip var komið til Føroya at taka fiskin hjá Yantarnyy.

Men tað skipið er farið úr Føroyum aftur uttan fiskin hjá Yantarnyy.