Løgmaður: Sverri er stóra fyrimyndin hjá okkum

Á móttøku í Tinganesi í dag heiðraði løgmaður nýklakta evropameistaran í einskullara-rógving.

Bárður á Steig Nielsen ynskti Sverra Sandberg Nielsen hjartaliga til lukku við avrikinum sum evropameistari. Hann ynskti honum eisini bestu eydnu við stóru avbjóðingini í OL-kappingini í Tokyo næsta ár. 

Tjóðarítrótt

- Rógving er okkara tjóðarítrótt. Ein ítrótt, sum myndar okkara staðseting sum oyggjaland í Norðuratlantshavi, og sum myndar okkara sterku bond til havið. Við hesum framúr úrslitum verður Sverri stóra fyrimyndin hjá okkum og okkara børnum, tí hann vísir í verki, at tey við venjing og stavnhaldi kunnu røkka stórum úrslitum. Eg vóni, at hetta fer at stimbra føroyska kappróðurin, sum hevur so stóran týdning fyri okkara samleika, segði løgmaður millum annað heilsan síni til Sverra.