Ógreitt um samráðingarnar verða tiknar uppaftur

Enn er ógreitt, hvat hendir við verkfallinum hjá sjúkrarøktarfrøðingunum.

Sjúkrahúsverkið boðaði í gjárlandsstýrinum frá, at tey kundu ikki longur veita eina langtíðar trygd á Landssjúkrahúsinum, tí sjúkrarøktafrøðingarnir játtaðu ikki øll undantøkini, sum biðið varð um.

Í kjalarvørrinum av hesi støðuni, heitti løgmaður í gjár á partarnar um at sessast aftur við samráðingarborðið sum skjótast.

Enn er einki at frætta um nýggjar samráðingar, men sjúkrarøktarfrøðingarnir hava nú gjørt av at ganga umbønini um undantøk á møti, og tey eru galdandi í 24 tímar.

Vænta at hin parturin eisini vísir vilja

Felagið hjá sjúkrarøktafrøðingunum sigur, at tað hevur víst ein vilja, og tí vænta tey eisini, at løgmaður vísir ein vilja, og fær Fíggjarmálaráðið aftur til samráðingarborðið.

Útvarpið hevur verið í sambandi við lønardeildina, sjúkrarøktarfrøðingarnar og semingsstovnin, men eingin hevur fingið boð um at taka samráðingarnar uppaftur.

Vit hava eisini roynt at fáa fatur á Jørgeni Niclasen, landsstýrismanni í fíggjarmálum, og løgmanni, fyri at vita, um lønardeildin fær fáa boð at taka samráðingarnar uppaftur, men hvørgin hevur svarað. 

Hetta er 11. dagur, at verkfall er.