FM í fótbólti kann verða avgjørt í dag

Avgerðin í FM-kappingini í fótbólti hjá monnum kann falla nú seinnapartin. Tá verða dystirnir í 26.- og næstsíðsta umfari í Betri-deildini spældir.

Á Tórsvølli verður dystur millum HB og TB. Vinnur HB, eru teir føroyameistarar. KÍ er einasta lið, sum kann fáa HB aftur. KÍ spælir í dag á útivølli í Runavík móti NSÍ. 

Fyrsti dysturin byrjar klokkan 14.30. Tá spæla ÍF og AB í Fuglafirði. Klokkan 15.00 byrja tríggir dystir - HB-TB í Havn, NSÍ-KÍ í Runavík og Víkingur-B36 í Gøtu.

Fimti dysturin er í Streymnesi millum EB/Streym og Skála, og hann byrjar klokkan 17.00.

Útvarpið fer at senda frá fótbólti seinnapartin. Sendingin Bólturin byrjar klokkan 15.00. Vit hava beinleiðis frásøgn frá dystunum í Havn og í Runavík, og fylgja annars við gongdini í hinum dystunum við.

Fótbóltslandskappingin endar komandi leygardag.