Ber ikki til at flyta grótið sjóvegis

Ikki ber til at flyta grótið úr Sandoyartunlinum eftir sjónum til Runavíkar.

Tað hevur Fíggjarmálaráðið fingið at vita frá felagnum Eystur- og Sandoyartunlum.

Og tað hevur Fíggjarnevndin hjá løgtinginum nú fingið at vita frá Fíggjarmálaráðnum.

Tunlafelagið hevur sagt, at møguleikin at sigla grótið hevur verið umrøddur. Tað tykist tó alt ov avbjóðandi. 

Ikki er pláss fyri stórari grótgoymslu á Gomlurætt. Harumframt er nógv annað virksemi á Gomlurætt. 

Kirkjubønes ein avbjóðing

Ein onnur avbjóðing er, at grótið skal førast um Kirkjubønes, sum kann vera sera harðbalið. 

Samanumtikið er niðurstøðan hjá felagnum, at tað ikki er møguligt at flyta grótið við grótbáti.

Runavíkar kommunu tekur helvtina av grótinum, sum kemur á Gomlurætt úr Sandoyartunlinum.

Er áhugi fyri grótinum, eru framvegis stórar nøgdir av gróti tøkar á Gomlurætt og í Traðardali, hevur Fíggjarnevndin fingið at vita.