40 prosent av farstøðini í Kastrup lata aftur

Floghavnin í Keypmannahavn letur 40 prosent av terminaløkinum aftur, orsakað av koronukreppuni. 24 portur - gate'ir - verða stongd frá 25. november í eitt ár, nú talið av ferðafólkum er minkað.

Floghavnin kann taka millum 30 og 35 milliónir fólk um árið, men nýggjastu tølini vísa, at talið av ferðandi er minkað 90 prosent. Tí er eingin orsøk til at hava opið í allar farstøðini.

5.600 ferðafólk um dagin

Í løtuni fara 5.600 ferðafólk um flogvøllin í Keypmannahavn um dagin. Somu tíð í fjør var hetta talið 83.000 um dagin.

Stongda økið fevnir um A-lonina og Vestur-lonina. Eisini verður inngongdin til trygdareftirlitið í Terminali 2 stongd. Broytingarnar hava við sær, at 24 av 78 gate'um verða stongdar.

Økið verður stongt alt 2021, men kann latast uppaftur eftir tveimum mánaðum, um talið av ferðandi veksur so mikið, at neyðugt verður við meira plássi. 

Spara streym og reingerð

Framrokningar vísa nú, at í fyrsta lagi í 2022 verður brúkt fyri allar farstøðini í Kastrup.

Rakstrarstjórin í floghavnini, Christian Poulsen, sigur, at møguleikar eru at spara t.d. streym, reingerð, røkt og varðhald. 

- Hvør króna, sum vit kunnu spara, er avgerandi, nú flogvøllurin hevur mist mestsum allar inntøkur, og vit mugu læna pengar hvønn mánað fyri at hava opið, sigur rakstrarstjórin.

Talið av fyritøkum, sum leiga í terminaløkinum, er eisini minkað. Fyri koronukreppuna vóru 140 eindir, sum leigaðu høli í terminalinum, nú eru bara 20 eftir, skrivar check-in.dk.