Kommunan skal útvega p-pláss á Karlamagnusarbreyt

Tórshavnar kommuna hevur fingið álagt at útvega fólki, sum býr við Karlamagnusarbreyt í Hoyvík, pláss til bilarnar.

Tað hevur Kærunevndin í lendismálum gjørt.

Nevndin hevur viðgjørt eina kæru um parkeringarviðurskifti.

Kærunevndin hevur álagt kommununi at vísa á felagsøki til bilar, sum serliga eru merkt til bara at umfata íbúðirnar, sum kæran var um.

Í minsta lagi eitt pláss

Íbúðirnar skulu hava í minsta lagi eitt pláss fyri hvørjar 75 fermetrar, íbúðin er.

Kærunevndin sigur, at tað er ikki í lagi, at kommunan ikki longu nú heilt nágreiniliga hevur avsett ítøkilig felagsøki til parkering fyri teir báðar íbúðarbygningarnar, kært er um.

Kærunevndin sigur, at byggingin í økinum verður sera tøtt.

Og har er sera nógv virksemi, so tað er serstakliga umráðandi, at parkeringarviðurskiftini á staðnum verða skipað á ein nøktandi hátt, sigur Kærunevndin í lendismálum.