Kunngerðin um nýggja Als-gjaldið lýst

Kunngerðin um, at inngjaldið í Als lækkar á nýggjárinum, er lýst.

Inngjaldið lækkar 0,25 prosentstig, úr 1,25 prosentum niður í eitt prosent.

Lækkingin er gjørd í samráði við Als-stýrið.

Inngjaldið hevur verið 1,25 prosent síðani 2012, tá tað fór úr einum upp í 1,25 prosent.

Útgjaldið hækkar

Men útgjaldið hækkar. Tað hevur løgtingið samtykt.

Útgjaldið fer úr 75 prosentum upp í 80 prosent av lønini. 

Hægsta útgjaldið hækkar samstundis úr 17.500 krónum upp í 18.500 krónur um mánaðin.

Sambært Als-stýrinum er fíggjarstøðan hjá Als nú so góð, at skipanin klárar eitt arbeiðsloysi, sum er átta prosent í 12 samfeld ár.