Skotland letur aftur

Skotland letur aftur á midnátt í kvøld. Tað boðaði fyrstiráðharrin, Nicola Sturgeon, skotska tinginum frá seinnapartin.

Samstundis kemur ein lóg í gildi, um at fólk skulu halda seg innandura allan januar. Tað skrivar Sky News. Flestu skúlar lata eisini aftur.

– Eg geri ikki av, tá eg sigi, at eg hava stúrt fyri støðuni, sum vit nú eru í, síðani í mars í fjør, segði Nicola Sturgeon í røðu síni fyri skotska tinginum.

Verandi tiltøk muna ikki nóg væl

Sturgeon segði, at støðan við nýggja frábrigdinum av COVID-19-virusinum, sum varð staðfest í Bretlandi herfyri, ger, at tiltøkini, sum longu eru sett í verk í Skotlandi, muna ikki nóg væl.

– Tað er umráðandi, at vit forða smittuni at breiða seg, og at vit fáa tamarhald á støðuni, meðan vit koppseta fyri koronu, segði Nicola Sturgeon.

Tí heldur hon, at neyðugt er lata Skotland aftur fyribils - eins og gjørt varð í mars í fjør. Myndugleikarnir í Skotlandi stúra fyri, at verða eingi stig tikin, verður heilsuverkið ovbyrjað av koronusjúklingum næstu vikurnar.