11 menn bjargaðir úr gullnámi í Kina

22 arbeiðsmenn vóru fangaðir í gullnáminum, tá ein spreinging tipti útgongdina og kvettu samskiftislinjurnar, 10. januar.

Teir 11, sum vórðu bjargaðir tíðliga í morgun, vóru í eini gongd meir enn 500 metrar undir jørð. Ein maður hevur higartil latið lív, meðan tað framvegis er óvist hvar hinir tíggju eru.

Frættu einki í eina viku

Reuters skrivar, at ein av teimum bjargaðu var sera illa fyri, meðan hinir tíggju vóru væl fyri eftir umstøðunum og megnaðu sjálvir at ganga til sjúkrabilarnar, sum bíðaðu eftir teimum.

Mennirnir hava fingið mat og drekka síðstu dagarnar, eftir at bjargingarfólk fingu samband við teir gjøgnum borihol síðsta sunnudag.

Onki samband hevði tá verið við teir í eina viku, men síðsta sunnudag føldu bjargingarfólk, at onkur hálaði í eina línu, sum var lorað niður gjøgnum eitt borihol.

Námini í Kina sera vandamikil

Síðani fingu mennirnir givið boð frá sær á einum pappírslepa, at 12 teirra vóru á lívi, meðan aðrir vóru fangaðir longur niðri í náminum.

Sambært Reuters eru námini í Kina nøkur av heimsins vandamiklastu. Í fjør doyðu 573 fólk í námunum í Kina.

Fleiri enn 600 fólk hava arbeitt við bjargingaroyndini, sum minnir sera nógv um støðuna í Kili í 2010. Tá vóru 33 námsarbeiðarar avbyrgdir undir jørð í samfullar 69 dagar.