Skilagott at samskipa íløgur hjá landi og kommunum

Føroya arbeiðsgevarafelag tekur undir við Kommunufelagnum, sum hevur vent sær til løgmann við uppskoti um betri samskifti og samstarv um virksemið hjá landi og kommunum.

Arbeiðsgevararnir siga, at grundleggjandi fortreytin fyri at tosa um virknan fíggjarpolitikk, er at samskipa alt alment virksemi við langtíðarætlanum, serliga á íløgusíðuni, men henda fortreyt er ikki í Føroyum.

Við at samskipa virksemið hjá landi og kommunum, eisini almennar grunnar og almenn partafeløg, ber til at sleppa undan alt ov stórum og ógvisligum sveiggjum í búskaparliga virkseminum.

Tá fæst størri gjøgnumskygni, sum eisini gevur privatu vinnuni tryggari karmar og størri møguleika at laga sínar ætlanir til virksemið í landinum.

Uppskotið hjá Kommunufelagnum er tí eitt gott stig á leiðini at tálma fíggjarpolitikkin, tá rekur við, og stóru sveiggini, sum søguliga hava eyðkent búskapin, sigur arbeiðsgevarafelagið.