Fáa dagpening eitt ár aftrat

Fólk á privata arbeiðsmarknaðinum, sum fara í sóttarhald, fáa eisini dagpengar komandi árið.

Elsebeth Mercedis Gunnleygsdóttir, landsstýrikvinna, hevur biðið um, at lógin, sum annars skuldi fara úr gildi nú 1.mars, verður longd til 1.februar næsta ár, tí korona er ikki liðug enn.

Sambært lógini verður sóttarhald javnsett við sjúku.

Eingin sólsetursáseting var í lógini, tá hon var í tinginum í fjør. Men Trivnaðarnevndin setti 1.mars 2021 í lógina. 

Fólk á privata arbeiðsmarknaðinum, sum skulu í sóttarhald, fáa dagpengar.

Kostað níggju mió. kr.

Ikki ber til at siga enn, hvussu nógv skipanin kostar landskassanum.

Fólk, sum eru í sóttarhaldi í tvær vikur, 10 arbeiðsdagar, kosta landskassanum 9.600 kr., 960 kr. um dagin.

Lógin hevur higartil, frá mars í fjør til hálvan februar í ár, kostað níggju mió. kr. 

Meira enn helvtin fór fyrstu mánaðirnar eftir, at korona kom til Føroya.