Føroyingar gista nógv meira á hotelli

Í februar vóru tilsamans 7.426 gistinætur á gistingarhúsunum í Føroyum. Tað eru næstan 900 fleiri samanborið við sama mánað í fjør.

Tað eru serliga gistingarhúsini í høvuðsstaðarøkinum, sum eiga lutfalsliga størsta partin av gistináttunum, sigur Hagstovan.

Í februar gistu 39 prosent færri danir á gistingarhúsunum enn sama mánað í fjør, meðan talið á fólkum úr øðrum londum minkaði niður í helvt.

1.800 fleiri føroyingar

Hinvegin vísa tølini, at føroyingar sjálvir brúka gistingarhúsini nógv meira. Í mun til februar í fjør gistu stívliga 1.800 fleiri føroyingar í februar í ár. Tað er tvífalt so nógv.

Hóast vøkstur er í gistináttum og innskrivingum, so er nýtslustigið væl lægri í februar í ár við einans 23,5 prosentum í mun til 35,1 prosent í februar í fjør.

Tvey nýggj gistingarhús vórðu liðug og tikin í nýtslu í fjør, og onnur vórðu útbygd.