Nýggja farmaleiðin til Hanstholm byrjað

Faroe Ship er nú farin undir siglingina á farmaleiðini millum Havnina  og Hanstholm.

Fríggjadagin kom fyrsta skipið hjá skipafelagnum til Hanstholm, skrivar TV2 Nord.

Við skipinum vóru 12 bingjur av feskum fiski úr Føroyum, ið varð sendur víðari til Spania, har fiskurin var frammi sunnukvøldið.

Tekur 350 bingjur

Farmaskipið Vantage hjá Eimskip, ið siglir á leiðini, tekur tó væl meira enn tað. Skipið tekur 350 bingjur, tá tað er fult lastað.

- Tá siglingin fyrst er byrjað, kemur áhugin fyri rutuni, sigur Nils Skeby, havnarstjóri í Hanstholm, við TV2 Nord.

Seinast, ein føst farmaleið var millum Havnina og Hanstholm, var í 2010. Tað var, tá Norröna sigldi til Hanstholm.