Funnin sekur: Derek Chauvin drap George Floyd

Fyrrverandi løgreglumaðurin í USA, Derek Chauvin, er funnin sekur í drápinum á George Floyd. Hann eru sekur í øllum trimum ákærupunktunum.

Teir 12 nevningarnir nýttu 10 tímar at koma fram til avgerðina. Málið er eitt av tí mest umrødda í nýggjari tíð. Enn er ikki greitt hvørja revsing, Derek Chauvin fær.

Tað verður ikki greitt fyrr enn um umleið átta vikur. Men hann kann fáa eina fongsulsrevsing upp móti 75 árum, skriva amerikanskir miðlar.

Hann er nevniliga funnin sekur í trimum ákærupunktum. Longsta revsing í hvørjum av teimum er ávíkavist 40, 25 og 10 ára fongsulsrevsing.